පෙල පොතේ මල ගම

සාමා එන්න - මල් පිපී දැයි බලන්න
කෝ අනේ සල් ගහ
මන්ත්‍රීගෙ ලී මෝලෙ
දැනටමත් පතුරු වී ඇති...
ඒත් කෝ අමර දැන්
කුඩු අරන් මත් වෙලා
කුනු කෙලත් පෙරාගෙන
බස්හෝල්ටෙකේ බුදි ඇති.........

රටකජු නාරං තබා
සීනි බෝලවත් නැතිවම
පැය ගනන් කඹුරලා
සොච්චමක් අතට ගෙන
පාං බාගෙත් අරන්
තාත්තා කෝච්චියෙ ඇති............

පැටවුන් බඩ බැඳ ගස්උඩ යනවා
කියන්න මගෙ නම කියන්න කීවත්
ලැයිසොන් තුවක්කු දෙවියගෙ උදහස
හින්දම වඳුරත් ගහ මුල දොයි ඇති...
සමහර විට අර දැල්වෙන ගින්දර
මැද රස හොද්දක් වෙලා හිඳින්නැති
ඒ ගින්දර පණ ගසා කියන්නේ
උගෙ අඹු දරුවක්ගේ දුක් වෙන්නැති............

කොලයක් ගත්තත් ඔරුව හදනු බැරි
සහස්‍රකේ අපි ඒවා දන්නැති
ඒකට ටියුෂන් යන්නත් ඕනැති
කොම්පීතර ගේම් වගේ නොවෙන්නැති..........

ඔරුවක් හැදුවත් වැස්ස දකිනු බැරි
පොත් තුල කිමිදෙමු තෙරක් පේන්නැති
සල්මලකක හැඩරුව නරඹන්නට
ඉන්ටනෙට්ටුවෙන් වරම් සොයන්නැති