පහත් නිම්නයේ පිපුන නන්නාඳුනන මල

හිරුගෙ ඇස නොගැටෙන පහත්ම නිම්නයක

වැරදීමකින්දෝ පිපුන පෙර නොදුටු සුවඳ මල

ජීවිතේ සොය සොයා දුරට පිය මනිනවද

කෙතෙක් දුර ඉගිලෙන්න සුමුදු පෙති සවි ඇද්ද

එදා දැක්කා වගෙම බිත්ති හතරම ගොළුයි

මේසයෙන් බිමට පැන හුණු කැටය ඉකිබිඳියි

මඟ හැරුණු පොත් මිටිය මතක සිතුවම් මවයි

හුරු පුරුදු හිනාවට මගේ නෙතු මග බලයි...

ජීවිතේ සුන්දරයි උඹ ඒක දන්නවද

නුඹ සතුට නුඹ ලඟයි - අනෙකු සතු නෑ නේද

කොහෙන් හෝ සොයාගෙන ලෝකයේ හොඳ දේම

ඔය සුවඳ පොද හෙටක ලෝකයට  දන් දෙන්න

නුඹ යනෙන මාවතේ කටු බෝම මල් සේම

ඇහිඳගත් අකුරු පොඩි බුමුතුරුණු වෙයි දිනක

බැඳී ඇති මකුළු දැල් මගැර පෙරටම යන්න

යම් දිනක නුඹට හැක අරුණැල්ල දැක ගන්න